திமுக கட்சியின் தலைமையிடம் நான் சொல்ல விரும்புவது ஒன்றே ஒன்றுதான்.
இனிமேல் திமுக எவ்வளவு முடியுமோ, அவ்வளவு கார்ப்பரேட் நிறுவனங்களுடன் வலுவான உறவுகளை உருவாக்க வேண்டும். அந்த நிறுவனங்களுடன் கொள்கை ரீதியாகத் தொடர்புகளை வளர்த்துக்கொள்ள வேண்டும். அதேபோல, மனிதவள மேம்பாடு, திறன் மேம்பாடு, தொழில்முறைப் பயிற்சி போன்ற துறைகளிலும் செயல்பட வேண்டும். ஒரு கார்ப்பரேட் நிறுவனத்தைப் போலத் திட்டமிட்டு, தொழில்முறையாக நிர்வகிக்கப்படும் அமைப்பாகத் திமுக மாற வேண்டும். அப்போதுதான் அடுத்தகட்டத்தில் கட்சியால் ஒரு பெரிய பாய்ச்சலை நிகழ்த்த முடியும்.
என்னுடைய அப்பா கட்சிக்காகப் போஸ்டர் ஒட்டுவார், தேர்தல் தொடர்பான அறிக்கைகளை எடுத்துச் செல்வார், வாக்காளர் சரிபார்ப்புப் பணிகளைச் செய்வார், கட்சி உறுப்பினர்களைச் சேர்ப்பார். இதுபோன்ற களப்பணிகளை அவர் செய்திருக்கிறார். ஆனால், என்னுடைய தலைமுறையில் இருப்பவர்கள் பலர் இதையெல்லாம் செய்யத் தயாராக இல்லை. அதற்கான ஆர்வமும் அவர்களிடம் குறைவாக இருக்கிறது.
ஒரு கட்சியில் உறுப்பினராகச் சேர்ப்பதற்காக வீடு வீடாகச் சென்று, ஒவ்வொருவரிடமும் விவரங்களைப் பெற்று, விண்ணப்பத்தை நிரப்பி உறுப்பினராக இணைப்பது போன்ற நடைமுறைகள் இன்றைய தலைமுறையினருக்குச் சிரமமான, ஈர்ப்பில்லாத வேலையாகத் தோன்றலாம். எனவே, கட்சி உறுப்பினர் சேர்க்கை மற்றும் தொண்டர் பங்கேற்பு முறைகளை நவீனப்படுத்த வேண்டிய அவசியம் இருக்கிறது.
தமிழ்நாட்டில் பெரிய அளவில் அரசியல் கருத்துருவாக்கத்தை (narrative setting) முன்னெடுப்பதில், ஐடி நிறுவனங்கள் மற்றும் பன்னாட்டு நிறுவனங்களில் பணிபுரியும் ஊழியர்களுக்கும் முக்கியமான பங்கு இருக்கிறது என்பது என்னுடைய கருத்து. மக்கள் தொகையில் அவர்கள் ஒரு சதவீதமோ, இரண்டு சதவீதமோ இருக்கலாம். ஆனால், அவர்களின் சமூகத் தொடர்புகள், தொழில்முறைச் சூழல், கருத்துப் பரிமாற்றங்கள் ஆகியவை பொதுவெளியில் உருவாகும் கருத்துகளின் மீது தாக்கத்தை ஏற்படுத்தக்கூடும்.
உதாரணமாக, லெனின் தலைமையிலான ரஷ்யப் புரட்சியை எடுத்துக்கொள்ளலாம். தொழிலாளர் வர்க்கத்தை அரசியல் ரீதியாக அணிதிரட்டுவதற்கு லெனின் முக்கியத்துவம் கொடுத்தார். அதேபோல, நாமும் அடுத்தகட்டத்தில் கட்சியை ஒரு பெரிய பாய்ச்சலுடன் முன்னெடுத்துச் செல்ல விரும்பினால், இன்றைய பொருளாதாரத்தில் முக்கியப் பங்கு வகிக்கும் தொழிலாளர் பிரிவுகளைப் புரிந்துகொண்டு அவர்களை அணுக வேண்டும்.
குறிப்பாக, வேலை பறிபோய்விடுமோ, நிறுவனத்திலிருந்து பணிநீக்கம் செய்யப்பட்டுவிடுவோமோ என்ற அச்சத்துடன் பணிபுரியும் ஐடி மற்றும் பன்னாட்டு நிறுவன ஊழியர்களை இலக்காகக் கொண்டு, அவர்களின் நலன்களுக்காகச் செயல்படும் ஒரு தனிப் பிரிவைத் திமுக உருவாக்க வேண்டும்.
வேலைப் பாதுகாப்பு, பணிநீக்கம், பணியிட உரிமைகள், மன அழுத்தம், ஊதியம், திறன் மேம்பாடு, தொழில்முறை வளர்ச்சி போன்ற பிரச்சினைகளில் இந்தப் பிரிவு கவனம் செலுத்த வேண்டும். அந்த ஊழியர்கள் எதிர்கொள்ளும் பிரச்சினைகளைப் புரிந்துகொண்டு, அவர்களுக்காகக் குரல் கொடுக்கும் அமைப்பாக அது செயல்பட வேண்டும்.
எனவே, திமுக தனது பாரம்பரிய அரசியல் அமைப்பைத் தாண்டி, கார்ப்பரேட் உலகத்துடன் தொடர்புகளை உருவாக்கும், மனிதவளத்தை முறையாக ஒருங்கிணைக்கும், தொழில்முறை நிர்வாகத்தைக் கடைப்பிடிக்கும் அமைப்பாக மாற வேண்டும். சுருக்கமாகச் சொன்னால், திமுக ஒரு கார்ப்பரேட் நிறுவனத்தைப் போலத் தொழில்முறையாகச் செயல்பட வேண்டும்.
அப்படிச் செய்தால்தான் இன்றைய தலைமுறையினரையும், குறிப்பாக ஐடி மற்றும் பன்னாட்டு நிறுவனங்களில் பணிபுரியும் ஊழியர்களையும், கட்சியின் சமூக மற்றும் அரசியல் செயல்பாடுகளுடன் இணைத்து, அடுத்தகட்ட வளர்ச்சியை நோக்கி திமுகவால் பயணிக்க முடியும்.
DMK – Dravida Munnetra Kazhagam
இதையெல்லாம் நான் ஏன் சொல்கிறேன் என்றால், இந்த ஒரு சார்ட்டில்தான் அதற்கான பதில் இருக்கிறது. தமிழ்நாட்டில் விவசாயத்தைச் சார்ந்த மக்களின் விகிதம் குறைந்து கொண்டே வருகிறது. ஒரு விதத்தில் இது நல்ல விஷயம்தான். ஆனால் விவசாயம் குறையக் கூடாது; விவசாயத்தில் ஈடுபடும் தொழிலாளர்களின் எண்ணிக்கைதான் குறைய வேண்டும்.
உதாரணமாக, ஆப்பிரிக்க நாடான புருண்டியை எடுத்துக்கொண்டால், அங்கு தனிநபர் வருமானம் மிகவும் குறைவு. அதே நேரத்தில், விவசாயத்தில் ஈடுபடும் மக்களின் விகிதமும் மிக அதிகம்.
எனவே, நாம் விவசாயத்திலிருந்து தொழிலாளர்களின் பங்களிப்பைக் குறைத்துக்கொண்டே செல்ல வேண்டும். அதற்காக விவசாயம் அழிய வேண்டும் என்று சொல்லவில்லை. விவசாயம் தொடர்ந்து இருக்க வேண்டும்; ஆனால், விவசாயத்தில் ஈடுபடும் தொழிலாளர்களின் எண்ணிக்கை குறைந்து, அவர்கள் மற்ற துறைகளில் வேலைவாய்ப்புகளைப் பெற வேண்டும்,இது படிப்படியாக நடந்து வருகிறது, எனவே அவர்களில் பெரும்பாலானோர் இந்த பன்னாட்டு நிறுவனங்களில் சேருவார்கள் என்பது வெளிப்படை. அதனால், திமுக இந்த மக்கள் பிரிவினரை கட்சிக்குள் ஒன்றிணைக்க வேண்டும்.
